చద్ది కూటి మంగళ వారపు నోము

స్త్రీలారా ! పరమ పవిత్రమైన శివాలయమందు పురాణ పండ పండితుల ఉపన్యాస మందలి ఒక నోము కధ ఇది. నిన్న నేను ఈ గ్రంధ మందు పొందు పరిచినాను . ఆ విద్వాంసుడు ,పండితుడు చక్కగా స్త్రీలకు చెప్పిన నోము కధ ,ఆచరించండి ,ఫలం పొందండి .

పరమ పవిత్రమైన దేవాలయం .అచ్చట భారత ప్రవచనం సాగుతోంది .ఒకనాడు ఒక స్త్రీ శాస్త్రిగారూ స్త్రీలకు ఉపయోగపడు నోము గురించి చెప్పి ఉద్యాపన వివరించి పుణ్యం కట్టుకోండి అని అడిగింది . విన్నారు శాస్త్రిగారు .ఆమెను ఉద్దేశించి అమ్మా ! చక్కని ప్రశ్న అడిగావు .ఇది నీకు ,నీతో వినే సభలోని ఆడువారందిరికి ఉపయోగ పడగలదు. ఇది ఒకనాడు శివుడు పార్వతికి తెలిపిన నోము .శ్రద్దగా ఆలకించి భక్తితో విని ,ఆచరించండి .అని ఆనాటికి భారత ప్రవచనం ఆపి ఆ స్త్రీ అడిగిన కధ ప్రారంబించారు పురాణ పండితులవారు.

పూర్వ కాలం నాటి మాట .ఆ కాలాన ఒక రైతు .అతడు పెద్ద భూస్వామి .బాగా బ్రతికిన వ్యవసాయ దారుడు. కాని విధి, కర్మ, కాల ప్రభావాన అతడు అనేక అపనింద పాలయ్యాడు . అష్ట కష్టాలు అనుభవించ వలసి వచ్చింది . నిందలకు, అపోహలకు ,అవమానాలకు , గురి అయ్యాడు. ఎంత వైభవంగా బ్రతికాడో అంత దరిద్రం అనుభవించాడు. ఎందరికో ఉపకారం చేసాడు. వారందరూ ముఖం చాటేశారు . కాల ప్రభావం నుండి విధి తప్పించే వారు లేరు. కర్మ అనుభవించ వలసిందే . అందుకే కాల పురుషునకు వందనం చేయాలి .అంతే కాదు కర్మ సాక్షికి కూడా అభివందన మాచరించాలి. రైతు ,ఆయన కుటుంబం అష్ట కష్టాలు అనుభవిస్తున్నారు.

కాలమాగదు .కర్మ దాగదు . ఆ కాల పరిభ్రమణంలో ఒకనాడు ఆ రైతు బార్య తన ఇంటికి వచ్చిన గ్రామ పురోహితునితో " అయ్యా ! బ్రాహ్మణోత్తమా ! మేమీ గ్రామాన ఎలా బ్రతికామో మీకు తెలియనిది కాదు. ఈనాటి స్థితి ,పరిస్థితి కూడా మీరు చూస్తున్నారు .ఇందుకు అనేక కారణాలు ఉండవచ్చు. మీకు నమస్కరిస్తున్నాను . ఎందరికో ఎన్నో ఇచ్చిన చేయి ఈ రోజు నాకై ఈయమని అర్ధిస్తున్నాను . ఈ స్థితి పరిస్థితి నుండి గట్టెక్కే ఉపాయం ఏదేని ఉంటె చెప్పి పుణ్యం కట్టుకోండి .అని ప్రార్దించింది .అంత ఆ గ్రామ పురోహితుడు - " అమ్మా ! శతకోటి దరిద్రాలకు అనంతకోటి ఉపాయాలు." నీవు చింతించ పనిలేదు బాధపడకు ,విచారించకు .ఒక చక్కని నోము ఉన్నది .ఆ నోము నోచి సుఖపడు . ఆ వ్రతము పేరు చద్దికూటి మంగళ వారపు నోము . శ్రమ పడనవసరం లేదు. చక్కని వ్రతమిది .పుణ్య ప్రదమైనది. శక్తి దాయక మైనది కూడా .

ఆ రైతు బార్య పురోహితునకు మరొకసారి నమస్కరించింది .వ్రత విధానం చెప్పమంది .

విని పురోహితుడు " అమ్మా ! శ్రద్దగా విను .ఇది శివుడు పార్వతికి చెప్పిన వ్రతము. నేను మీకు చెబుతున్నాను ,శ్రద్దగా విను.

సోమవారం సాయంత్రం కాగానే అన్నం వండుకుని కూరలు తయారు చేసుకుని వాటిని జాగ్రత్తగా భద్ర  పరుచుకొని మంగళవారం తెల్లవారు జామున లేచి కాలకృత్యములు తీర్చుకుని మదిబట్టలు కట్టుకుని దీపం వెలిగించి నమస్కారం చేసి అనంతరం ఒక ముత్తయిదువును పిలిపించి ఆమెకు భోజనం పెట్టవలెను. ఆమెతో పాటు నీవు కూడా ఆ చద్దన్నం భుజించ వలెను . ఒక సంవత్సర కాలం ఇలా చేయాలి . మంగళవారము మాత్రము మరచిపోకూడదు .సంవత్సరం పూర్తి అయ్యాక చివరి మంగళ వారము నాడు సోమవారం సాయంత్రం తయారు చేసిన భోజన పదార్దములు కర్మ సాక్షికి అనగా సూర్య భగవానునికి నివేదన చేయవలెను. అనంతరం 13 మందికి తలంటి నీరు పోసి , భోజనం పెట్టి , క్రొత్త బట్టలు సమర్పించి ,వాయనము లీయవలెను . ఈ వ్రత కాలాన ఉపవాసం చేయ నవసరం లేదు .అన్నీ తిన వచ్చును. కాని శ్రద్ధ ,భక్తి ,నియమం , నిష్ఠ ,మాత్రం అవసరం .అన్నిటికన్నా నమ్మకం ముఖ్యం " అని చెప్పి పురోహితుడు వెళ్లి పోయాడు .

ఆయన చెప్పిన ప్రకారం ఆ రైతు బార్య చేసింది .నోము ప్రభావం ,వ్రత మహిమ కారణంగా మరల ఆమె పూర్వ వైభవం సంపాదించు కుంది . సిరి ,సంపదలతో పాటు పంటలతో హాయిగా ,సుఖంగా జీవించింది. సంఘంలో గౌరవం ,పరువు, ప్రతిష్టలు సంపాదించు కుంది ఇది చద్దికూటి మంగళవారపు నోము కధ వ్రత విధి, ఉద్యాపన విధిని .

దీనిని శివుడు పార్వతికి చెప్పాడు, ఆ కధ చాలా ప్రచారమైంది .అనంతరం పురాణ పండ పండితుడు ఒక సందర్భంలో తన భారత ప్రవచ కాలాన ఒక స్త్రీ అడుగగా చెప్పాడు. దానిని విని నేను ఈ కధను ముందు తరాల వారికి ఈ గ్రంధ మందు పొందు పరచాను .కధ చదివి వ్రత విధానం తెలిసికొని ఉద్యాపన విషయం అవగాహన చేసికొని స్త్రీలు ఆచరించిన , నోచిన చక్కని ఫలితంకలుగుతుంది . నమ్మిక లేనివారు నాస్తికులు ,కువిర్మహులు దీనిని ఆచరించ వద్దని మనవి. నమ్మకంతో చేసి ఫలం పొందండి .

కాల పురుషునకు వందనం
కర్మ సాక్షికి వందనం
గౌరీ దేవికి వందనం
పరమేశ్వరున కభివందనం
-------మంగళం --------