అమావాస్య సోమవారపు నోము

పూర్వము కాంచీ పురమను పురము ఉండేది .ఆ పురమందు వేద శర్మ అను పేరుగల ఒక బ్రాహ్మణుడు ఉండెడివాడు. అతడు మంచివాడు .మర్యాదస్తుడు .పరువు ప్రతిష్ట లున్న బ్రాహ్మణుడు .సదాచార సంపత్తి గలవాడు. నియమ నిష్టలతో జీవితం గడుపుకునేవాడు .ఆయనకు వివాహమైనది .ఆ దంపతులకు శివ శర్మ అను కుమారుడు ,గుణవతి యను కుమార్తె కలిగారు. ఇద్దరే సంతానం .తండ్రి వారిద్దరి జాతకములు వ్రాయించాడు, జాతకములు వ్రాసిన పండితులు వేద శర్మా ! నీ కుమార్తె జాతక ప్రకారం ఆమెకు అయిదవ తనం నిలువదు. భర్త చనిపోతాడు .వైధవ్య మనుభవిస్తుంది. అంతా విధి వ్రాత ఏం చేయగలం అని పలుకగా విని ఆ బ్రాహ్మణుడు విచారించి పండితులారా ! నా కుమార్తె సుమంగళి గా ఉండే మార్గమే లేదా అయిదవతనం నిలిచే ఉపాయం లేదా ? సుమంగళిగా సుఖంగా హాయిగా జీవించే మార్గం ఉపదేశించండి . ముత్తయిదువుగా జీవించాలామే అని పలుకగా విని వారందరూ వేద శర్మా ! ఒక వ్రతమున్నది. ఆ వ్రత మాచరించిన వారు ప్రతిఫలం నుండి కనీసం పదవ వంతు ధార పోసిన నీ కుమార్తె యగు గుణవతి మాంగళ్యం నిలువ గలదు. ఇక వ్రతం పేరు చెప్ప మందువా ? అమావాస్య సోమవారపు నోమది.

ఆ నోము నోచిన వారు ప్రతిఫలం ధార పోయాలి .అందువల్ల నీ కుమార్తె యగు గుణవతి దీర్ఘ సుమంగళి కాగలదని చెప్పి వారందరూ వెళ్ళిపోయారు. బ్రాహ్మణుడు తన కుమారుని పంపి అమావాస్య సోమవార వ్రతం నోచిన వారెక్కడ ఉన్నారో తెలిసికొని ఆమె అంగీకారం పై గౌరవ మర్యాదలతో తన ఇంటికి తీసుకు రమ్మని పంపాడు. కుమారుడు తండ్రి ఆదేశాను సారం తన సోదరికి శుభం కలగాలని బయలుదేరాడు. కాంచీ పురమునకు నూరు యోజనముల దూరమున ఒక పట్టణము కలదు.అందు ఒక పుణ్యాత్మురాలున్నది . వివరములు తెలిసికొని విషయములు చెప్పి అతడు ఆ ధన్యాత్మురాలిని వెంట బెట్టుకుని తన ఇంటికి వచ్చాడు . అనంతరం గుణవతి వివాహం జరిగింది . ఆ మరునాడే వరుడు మరణించాడు .అంత వేద శర్మ అమావాస్య సోమవారం వ్రతం చేసిన పుణ్యాత్మురాలి పాదాలపై పడి పదవ వంతు ఫలం ధార పోయమని ప్రాదేయ పడ్డాడు. ఆ తల్లి కరుణించి ధార బోసింది .వ్రత ప్రభావం వల్ల మరణించిన ఆమె భర్త బ్రతికి బట్ట కట్టాడు .వ్రత ప్రభావం ఎంతని వర్ణించగలం నోము ఫలితమది . అది మొదలు ఆడువారు పసుపు -కుంకుమ లకు సుమంగళత్వమునకు మగని క్షేమం కోరుతూ అమావాస్య సోమవారపు నోము నోయ సాగారు.ఆచరించ సాగారు .ఇక వ్రతమునకు ఉద్యాపన విషయం .

సోమవారము నాడు వచ్చిన అమావాస్య అయి ఉండాలి .వ్రతము ప్రారంబించాలి .ఉదయమునే మేల్కొని మడిగా రావి చెట్టును చేరి నూట ఎనిమిది రేగు పండ్లు గాని లేదా ద్రాక్ష పండ్లు గాని ఒక చోట ఉంచుకోవాలి .రావి చెట్టుకు నూట ఎనిమిది సార్లు ప్రదక్షిణం చేయాలి . తడవకు ఒకటి చొప్పున వడి యందు రేగు పండు గాని ద్రాక్ష పండు గాని వేసుకోవాలి .ఆ పండ్లను చిన్న పిల్లలకు పంచి పెట్టాలి. అనంతరం ఆ చెట్టు క్రింద శుభ్ర పరచాలి .మంచం వేయాలి .అందు లక్ష్మీ నారాయణులను ఉంచి పూజించాలి .కొబ్బరికాయలు సమర్పించాలి . అనంతరం బ్రాహ్మణునకు దక్షిణ సమర్పించాలి . ఇలా నూట ఎనిమిది మారులు చేసిన సిరి సంపదలతో సంతానంతో ఇహమందు మోక్షం పొందుదురు .భక్తితో ,శక్తితో చేసి ఫల సిద్ధిని పొందండి .ఆడు వారు అందరూ ఈ వ్రతమాచరించి మగని క్షేమ మాచరించి సుమంగళులుగా జీవించండి .నియమ నిష్టలతో ఈ వ్రత మాచరించ వలెను .తప్పక ఫలం లభిస్తుంది .