అట్ల మీద ఆవ పూల నోము

ప్రాచీన కాలం నాటి మాట .ఆ కాలాన ఒక ధనికురాలుండేది .ఆమె గొప్ప శ్రీమంతురాలు . ఆమె అనేక నోములు నోచినది .అందులో అట్ల మీద ఆవ పూల నోము ఒకటి . ఆ నోము పట్టినది కాని మధ్యలో మానేసింది .ఎందుచేతనో విడిచి పెట్టింది . దాంతో ఆ శ్రీమంతురాలి భర్త ,కుమారులు మరణించారు. సంపద పోయినది దరిద్రురాలైనది ఎవరూ ఆదుకోలేదు గొప్పగా జీవించిన ఆ ఇల్లాలు ఉన్న ఊరిలో ఉండలేక విచారిస్తూ , బాధపడుతూ ,దుఃఖిస్తూ అడవుల వెంట బడింది. దారి తెన్ను కానక తిరుగుతోంది .

అలా తిరిగే ఆమెకు ఆ అడవిలో పార్వతీ పరమేశ్వరులు కనిపించారు . ఎవరివమ్మా నీవు అని అడిగారు .ఏ ఊరని ప్రశ్నించారు . విచారిస్తూ ఇలా అడవి లో సంచరించ డానికి కారణం ఏమిటని వివరంగా చెప్పమని అడిగారు. ఆమె బదులు చెప్పలేదు సరికదా విసుక్కుంది . నా విషయం మీకెందుకంది. చీదరించు కుంది .అవును లెండి తప్పు ఆమెది కాదు కష్టాల వల్ల అలా అంది .అడిగిన వారు గౌరీ -శంకరులని ఆమెకేం తెలుసు. వారు ఆమె కష్టాలు తీర్చే వారని మాత్రం ఆమె గుర్తించ గలదా ? దుఃఖించి ముందుకు పోసాగింది .

అంత పార్వతీ పరమేశ్వరులు -పిచ్చిదానా ! నీ కధ అంతా మాకు తెలుసు .మేము ఆది దంపతులము ,ఉమా మహేశ్వరులము .నీ బాధ తీర్చాలని నీ కష్టాలు గట్టెక్కించాలని ఇక్కడ ఉన్నాము. నీవు అట్ల మీద ఆవ పూల నోము విడిచి పెట్టావు . అందుకే అష్ట కష్టాలు పడుతున్నావు . మించి పొయిందేం లేదు .శ్రద్దగా విను .పన్నెండు ఆవ కొమ్మలు తీసుకుని రా .అవి పూతకాయలతో ఉండాలి .వాటిని పన్నెండు అట్ల మీద పెట్టు .రవికుల గుడ్డ ,దక్షిణ తాంబూలము ,నెయ్యి ,బెల్లము తెచ్చి వాయన మిచ్చి నమస్కరించు ,అంతే నీ కష్టాలు గట్టె క్కుతాయి . బాధలుండవు. చీకు చింత తొలగి పోతాయి .దరిద్రముండదు. శ్రద్దా శక్తులతో ఆచరించు. లోపం జరగనీయకు అని చెప్పి వారిద్దరూ అంతర్ధాన మయ్యారు.  ఆ ఇల్లాలు శివ పార్వతులు చెప్పిన విధంగా చేసింది .తన అపచారానికి పశ్చాత్తాప పడింది. భక్తితో వ్రత మాచరించింది .సుఖ పడింది. కధ యందు వివరంగా ఉద్యాపన చెప్ప బడింది .భక్తి శ్రద్దలతో ఈ వ్రతం చేసి స్త్రీలు  ఫలం పొందండి స్త్రీ లందరూ చేయవచ్చు అత్యంత ఫల ప్రదమైన నోము ఇది .


పాట
అట్లమీద ఆవ పూల నోము యిది
అంద రందరాచారించు నోము యిది
పేదవారు చేసిన శ్రీమంతులగుదురు
ధనవంతులు చేసిన కుబేరులే అగుదురు
పూత -కాయలు గల ఆవ కొమ్మలు తెచ్చి

పదిలముగా పన్నెండు అట్లపై ఉంచి
బెల్లము ,పేరిన నెయ్యను తెచ్చి
దక్షిణ తాంబూలము లనవి యిచ్చి
రవికెల గుడ్డతో వాయనము నిచ్చి
ఉద్యాపన జేసి ఉపచారములు చేసి
ఆది దంపతులకు ముందుగా మొక్కి
శివ -పార్వతులకు మీరు శిరసు నే వంచి
శ్రద్ధతో భక్తితో నియమ నిష్టలతో ను
అత్యంత ప్రీతితో వ్రత మాచరించి
ఫలమును పొంది సుఖమును పొంది
మీరాచరించి అందరికి చెప్పి
సుఖ శాంతులు పంచండి స్త్రీలందరకు మీరు
భోగ ,భాగ్యాలతో బ్రతకండి అందరూ
మంగళం , మంగళం, మంగళం మూర్తికి
మంగళం, మంగళం, మంగళం తల్లికి .